PENSIONIERTENVEREIN DER KANTONSPOLIZEI BASEL - STADT
gegründet 1938



Herbst-Plausch 2016
vom 8. September



Dr Hèèrbschtblausch 2016

Viili vò ùns dien am ‚Hèèrbschtblausch' hange
ùnd mit Häärz ùnd Seel drùff aane blange.
S Gsèllige ùnd dr Gnùss schlöön uss ùffs Plùss.
Wärs Geegedäil bhauptet, kùnnt halt nìt druss.

Sòtt esoone Aalòss bsùnders guet glìnge,
duet das e guets Wätterglügg vòòrbedìnge.
Mi ‚Peetrùs' hètt si Iiflùss super ussgnùtzt
ùnd üüber is dr Hìmmel blìtzblangg bùtzt.

Dr Hìmmel ìsch schön blau, dòch dr ‚Peetrùs' nìt.
Vòm ‚Bròseggò' wìrd mes au, wènns zviil drvoo gìt.
D ‚Astrid' ùnd d ‚Mooni' dien schò bìm Apèro drùff achte,
ass d Gèscht gnueg uff ììr Gliichgwìcht dien achte.

Noonem Apèro am Èlfi ziets als wie mee aa,
wèll me glii fein ùnd au gnueg Ässe kaa.
Dr 'Peeter' wäiss gnau, wie mes Risòttò riert
ùnd drnääbe dr ‚Thòmi', wie me d Steiggs grìlliert.

Dr ‚Beni' duet sìch prima als Breesi entfalte
ùnd danggend e luunigi Aasprooch halte.
Drei Faggte schiinenen aber dütlìg z gwääle:
Vìll Èèremìtglììder, Èèregèscht ùnd d ‚Alice' dien fääle.


D Kassierere ‚Alice' - ùms kùrz zämmezfasse -
hètt läider uss gsùndhäitlìche Gründ miese basse.
Bì den Èèregèscht lòssts ììre vòlle Kaländer nìt zue.
Bruuchen ächtsch d Èèremìtglììder e bìtzlì mee Rue?

Für Dìì ‚Alice' wär nò dä bsùnderi Wùnsch doo:
Gueti Bèsserig mìt dr Hòffnig, ass de wìder kasch koo.
Bhalt di Zueversìcht - dòch mr wüsse, am Änd
lìggt dää Entschäid vòr allem ìn Dine Händ.

Ùnseren Ex-Kassiee hèt nìt lang mìt sich grùnge.
Dr ‚Francis' ìsch sòfòòrt ìn d Brèsche gsprùnge.
Das Èèremìtglììd zäigt sìch als dr ‚Naagel ìn dr Noot',
wò bestìmmt hèbt, bìs es dr ‚Alice' wìder bèsser goot.








Me duet nìt nùmme zämme drìnggen ùnd ässe,
es wììrd au ussgììbig brìchtet ùnd zämmegsässe.
Ùnsere gschìggte ‚Benò' döörf au nie me fääle.
Sini Flùùgschau z bestuune, sòtt men allne empfääle.

Sini Mòdäll duet er nìt nùr stüüre, sòndern au baue.
Sini Flùgkünscht dien äim fascht uss de Sògge haue.
Bìm Fliege dien die Maschììne sìcher nie überhìtze,
drfüür brìnge si dr Piloot ùnd dr Fòtògraaf ìns Schwìtze.

S Èèremìtglììd ‚Kunò' gültet als ‚en Ìnschtituzioon':
Als Lòttò-Dätschmäischter ìsch är ‚die' Sensazioon!
Er schaffts, ass me geege ‚Bars' ìn de Lööslì wielt,
was dènn au viil söttigs ìn d Veräinskasse spielt.

Nùmme vòr öppis sòtt me sìch ùnbedìngt hiete:
Vòòr däne zaalriiche käibe ‚Mèrsi-Niete'.
S Ùffrisse vò ììne verlaufft bestìmmt nìe rùnd
ùnd ììri Agraffe machen äim d Fìnger wùnd…



Am Änd erlaubet mr nò dää kùùrzi Gedangge:
Bì allne Mööglìgkäite zäige sìch au Schrangge.
Ooni tòlli Òrganisazioon, ooni zfrììdeni Gèscht,
aber au ooni flissigi Lüt, gìts nie e glatts Fèscht.

Andy Kunzelmann
Homepage: Werner Hohler
11. September 2016