PENSIONIERTENVEREIN DER KANTONSPOLIZEI BASEL - STADT
gegründet 1938



Herbst-Plausch 2018
vom 6. September



Dr Hèèrbschtblausch 2018

…ìsch gschrììbe wòòrde - me stèll sìch's vòòr -
brèziis ìm achzigschte Jubileeùmsjòòr!

S Duo 'Astrid' ùnd 'Monika', bäidi mìtenand,
hänn bìm Empfang ùnd Apèrò e glügglìgi Hand.
Dr 'Bròseggò' stoot fein kiel zùm Drìngge beräit,
zämme mìt em Spägg-Gùùgelhòpf ìn Zwäisamkäit.


Bròminänt ìsch e Deggòrazioon ùff ere Fòtti z gsee.
An sò schöön dèggde Dìsch gniesst mes Gschee.
Die wò si dèggt hänn, mien e gòldigs Händli haa,
guet aagläitet vòm Duo 'Astrid' ùnd 'Monika'.

Dr Breesi 'Beni' zäigt sìch ùnsere Gèscht gwoont flòtt
ùnd bewiist mìt sinere Reed wie me's mache sòtt.
Fründlìg begriesst er d Èèren- ùnd alli andere Gèscht
ùnd wiist vrständlìg dr Wääg zùm ene glatte Fèscht.

Die bäiden Èèregèscht döörfi dò bsùnders erwääne.
Si sìtze nääbenander bì den Èèremìtglììder ääne.
Dr Hèrr 'Fabbri' ùnd dr Hèrr 'Girard' erwiisen is d Èèr.
Gschètzti Hèrren Èèregèscht, das fröit is sèèr.


Lut em 'Beni' ka me bìm bekannte 'Güggeli-Maa'
briiswäärts ùnd ganz vòòrzüüglìgs Ässe haa.
E 'Gùmmiaadler' nòne baar dausig Flùùgstùnde,
wùùrd broote, ìm Gaume als köschdlìg empfùnde.

Aagfange mìt eme ganz früsche Nüsslìsalaat,
fieri das kuum zuenère Art Gaume-Spagaat.
Drzue empfääli er sò ideaali Häärdöpfelschnìtz,
'Country Cuts' gnènnt, broote bì dr rìchtige Hìtz.

Dr Beni mäint witer, e sòttigs Ässe sig begäärt,
ùnd mìt eme fètten Obòlùs bekùndi me si Wäärt.
Sò könn me mìt Banggnoote ìn Schwizerfrangge
s blau Fässlì bì dr Kassierere 'Alice' ùfftangge.

He joo, ùnseri 'Alice' - si kùnnt äifach druss.
Spììlend wäggslet si Noote ùnd gìt d Gupõ uss.
Mìt deene stoot me dènn aa bìm 'Güggeli-Maa'
ùnd kaa bì ììm geege dr Hùnger s fein Ässe haa.




S äinzigi, wò mi e Bìtz an däm feine Ässe stöört,
ìsch, ass me sò amerikaanischi Ussdrügg höört.
Schiints lìggt's doo draa ùnd me seet dä Gwìnn,
ass me jètz rueig saage kaa: "Au mììr sìnn ìn".

D Fòttene zäiges, doo wìrggt niemer vrdròsse.
Das Ässe wììrd vò de Gèscht bsùnders gnòsse.
Drzue drìnggt men e Wasser, e Bierlì òdr au Wii.
Ganz gnau esoo sòtts jò schliesslìg au sii.



Es ìsch dr 'Enrico' wò galant ùnseri 'Romy' aasäit.
Sìì, wò mit ììrer Gitaare e Struss Lieder vòòrdräit.
Dò höört me wèder Sprüch nòne dùmms Gekìcher.
Gnòsse hèt me's - ùnd glatscht wììrd ùff sìcher.



Dr 'Hèèrbschtblausch' hätts schwììrig ooni dä Maa:
Är ìsch si Kòpf ùnd au dr Schèff 'Tòmbòla'.
Dènn nò dr Läithammel vò alle guete Gäischter.
Dr 'Kuno' blibt äifach dr bèscht Dätschmäischter.

Lueget bìtti aane ùffs Trio vò spezielle Dìsch,
wò vòll vò schöön brèsèntierte Gooben ìsch.
S Glügg entschäidet dènn am 'Tòmbòla'-Änd,
d Goobe wäärde verschoobe ìn glügglìgi Händ.

Säll Glügg duet sìch vòrem Schriiberlìng hiete.
Dää ìsch schiint's zueschtändig nùmme für Niete.
Mìt deene 'Mèrsi-Zeedeli' stoot er allewiil aa.
Hòffentlìg kùnnt si Noochfòlg nìt au gliich draa.



Für esoone kùùrzwiiligs ùnd glùnges Fèscht
Bruuchts viil zfrììdeni ùnd glùngeni Gèscht.
Aber au e Zòttlede vò hìlfriiche Gäischter,
ùff dr Fòtti veräint mìt ììrem Dätschmäischter.

Zùm Änd nòne Gedangge in äigener Sach:

Noo zää Jòòr 'Hèèrbschtblausch' ìsch es sò wit.
Für nöii Wääg ùnd Idee'e ìsch's an dr Zit.
Dènn jeede nò sò ìntresante ùnd schööne Pfaad,
ändet - zviil wìderhoolt - bìm Hamschterraad.

Die Iisìcht ìsch langsaam koo ùnd überlèggt:
"Andy, di Väärslìgrìffel wììrd ùff d Site glèggt!"
Dr nöie Graft - wäär's au ìmmer kaa sii -
wünschi Fantasii, viil Glügg ùnd Enèrgii.

Andy Kunzelmann
(Fötteli ùnd Täggscht)
Homepage: Werner Hohler
9. September 2018