PENSIONIERTENVEREIN DER KANTONSPOLIZEI
BASEL - STADT


Vereinsreise 2009
'Protokoll' vo dr Vereinsreis 2009
von Andy Kunzelmann

Eimool im Jòòr - find ich das toll -
schryyb ich in Värsform my Protokoll,
wart zerscht lang uff e ‚Muusekuss':
Grieg ich dää, kumm ich voll in Schuss!

Grund drzue bietet unseri Jòòresreis,
mit em Datum, wo jedes Mitglììd weiss.
Träffpunggt: Basel, Garteschtrooss.
Vo dört uss goht's denn richtig los:

By Sunneschyyn rollt's per ‚Saner-Bus',
durs grieni Sundgau - isch das e Gnuss!
Denn fahre mir noo ‚Briisach' über e Rhyy.
E richtigi Kaffipause muess eifach syy.

Dr Bligg uff ‚Briisach' isch e bsunderi Sach,
wärde doch Erinnerige ans letscht Jòòr wach.
Unseri Schofföre gän sich wirgglig Mieh,
si sin nie z schpoot, aber au nie z frieh.
Samt em Chef-Schofför - äär heisst Urs -
fahre mir wyter an e Schparggle-Kurs
uff em ‚Bohrerhof', so heisst das Guet,
wo me über die Fäldfrucht viil erfaare duet.

Flyssigi Händ dien si schtäche, butze, schelle,
dääglich tonnewyys - 's gääb no viil z verzelle.
E Gnochenarbet, me dörf das nie vrgässe,
mit em Ziil: Zfrììdene Gèscht und feyns Ässe:

'S perfäggti Vrhältnis zwüsche Süüre und Baase,
em Maage zuegfiehrt via Muul unter dr Naase,
au gnueg Wasser drzue, um alles z verdaue,
wenig Alkohol, wo eim uss de Sogge kaa haue.

Nei! Drinn unter em Himmel vom wysse Zält,
bim ‚Bohrerhof', doo herrscht e-n-anderi Wält.
D Vorschpyys, d Subbe und s Schpargglegricht
samt Dessert und em Dröpfli sin e ‚Gaume-Gedicht'.


Vom ‚Bohrerhof' fahre mir wyter noo ‚Schtauffe',
em historische Schtèdtli, wo me sich nit kaa vrlaufe.
Es laadet is yy zem verwyyle, z flaniere -
au zem e ‚Digestif' vor em ‚Kornhuus' z probiere.


By dr Ruggfahrt noo Basel seht me Häng voll Rääbe,
d Alpe in dr Heimet - hei, isch das doch e Lääbe!
In de Büs die Pangsionierte, wo gniesse und schtuune,
und kei Gsicht wyt und breit mit schlächter Luune.

Au d Schofföre wärde die Tour kuum vrgässe,
si griege ììr Dringg-Gäld, rächt fürschtlig bemässe.
Bym Usschtyyge han ich mir vo eim saage loo,
mìr Pangsionierte dörfe zwyyfelsooni wider koo.

Vor dr ‚Uelistuube' het sich e gschrumpfti Runde,
no zem ene Noochdrungg nomool zämmegfunde.
Es isch dört luschtig gsìì, me het vill glacht,
und eine het sich als Witzbold e Naame gmacht!

Soo, my Protokoll will ich definitiv beände,
und loss es mit dère Schtrophe bewände.
Ich leeg all my Schribzüüg für hüt uff d Syte
und gang uuse go my Horizont usswyte.

_______________________________________________

Wir durften wiederum einen sehr schönen Tag verbringen.
Vielen Dank den Organisatoren.
s'Värsli isch vom Andy Kunzelmann und Fotos vom Andy und vo mir.
Wie ich nachträglich erfahren habe, sind hier noch sehr schöne Fotos auf Picasa von Franziska Gambirasio zu sehen. Danke
8.05.09 Werner Hohler Webmaster