|
‚Bròtòkòll' vò dr Veräinsräis 2011
 |
Äins, zwäi, drei, mit schnällem Schrìtt,
lauft d Zit drvoo ùnd me lauft mìtere mìt:
Die hüttig Veräinsräis ìsch schò wìder Gschìcht,
ùnd s ‚Bròtòkòll' ìsch fèllig in Fòrm vòm Gedìcht:
Hùndertùndsìbzig bangsiònierti Phèrsoone
hänn gfùnde, es wùùrdi sìch absòlut loone
an d Gaarteschtrooss z faare òder au z flìtze,
ùm döört in äine vò vier Gaar iine z sìtze.
|
 |
Die Bassaschier - das ìsch dòch geniaal -
faare bì Sùnneschiin dùr s Wììsedaal,
gniesse d Landschaft bìs zùm Titisee,
ùm döört früsche Kaffi und e Gìpfeli z see.
|
 |
Ìm Rèschti ‚Bäärgsee' wärde die ùnvrdròsse
ìn gmietliger Rùndi ganz zümpftig gnòsse.
Dènn goot me zùm See - dää Durìssmùsbegrìff -
ùnd füllt döört bigòscht zwäi Durìschteschìff.
|
Ùff em See befiechte die dùrschtige Seele
mìt Wisswii òder Wasser ììri dròggene Keele,
ùm drùff mìt zuenäämend häiterer Luune
die moolerischi Geegend ùm das Nass z bestuune.
|
Drwiile waart ich mìt eme gwüsse Verdrùss
nò vergääbes ùff en iigääbige Muusekùss.
Ich zerschtröi mi bì dr Gaarfaart ùff ‚Riedböörìnge'
ùnd fröi mi uff e Wììrt, wò nachem Kòche duet sìnge.
S Ässe, wò aafoot mìt ere Suppe ùnd Salaat,
ìsch super ùnd nìt nùmme schnäll baraat.
Drùff fòlgt dr Hauptgang, e saftige Broote.
Au d Biilaage und s Dèsseer sìn briima groote.
|
 |
S Drìnggen ìsch - ich mach druss käi Heel -
guet geegen e Glùggsi ùnd Balsaam für d Seel.
Ùnd em Prèsi duets allewiil bèschtens glìnge,
ìn Küürzi viil z saage ooni Reede z schwìnge.
|
Kuum sìngt dr Wììrt ùnd grifft ìn d Daschte,
seesch èlteri Bäärlì zer Danzflèchi haschte.
Si dänzle zämme wie am Stägge dr Lùmpe,
ooni, wie die Jùnge, ùmmenander z gùmpe.
Äins, zwäi, drei, mit schnällem Schrìtt,
lauft d Zit drvoo ùnd me lauft mìtere mìt:
Schlùss mit em Danz, ab in vier Gaar;
D Sùnne wèrmt ùnd dr Hìmmel blibt glaar.
|
D Faart aaben ùff ‚Sèggige' ìsch e Gnùss;
me hòggt äifach guet ìmene mòdäärne Bùss!
Die lètschti Kaffiphause gìts ùnden am Rii:
Esoo muess dr Aafang vòm Ussglang sii.
Bì ùnsere Schòffööre wìrd schò nie gfloont;
das wìrd mìt eme rächte Dringggäld beloont.
Dr Schòfföör ‚Gaar zwäi' - han i ghöört glaage -
häigs vòr Überraschig nümm gschafft, Mèrsi z saage.
Me kaas nooni ganz mìt däm lò bewände.
D Veräinräis, sìì duet allewiil z Baasel ände.
Dr Vòrstand mìtere Grùppe duets nò gniesse
vòr dr ‚Uelistùùbe' nüt mee mache z miesse.
|
Nòne phèrsöönlige Gedangge zem Schlùss:
Für mìì ìsch es glaar ùnd sìcher käi Määr:
Kuum e Veräinsräis, fäälti dr Seggretäär;
ooni dr Prèsi ùnd dr Kassiee fürs Finanzièlle;
fäälti iich, wurd mes nùmmen anderscht vrzèlle.
Andy Kunzelmann
(gschrììben ìm nöie Baaseldütsch)
|
|
Dank diesem einmaligen Anlass haben wir uns wieder für einen Tag getroffen und konnten viele Gedanken austauschen und natürlich von
früher erzählen. Würde es diesen Ausflüg nicht geben, man müsste ihn sofort erfinden. Ich sage unserem Vorstand vielen Dank,
er hat keine Mühe gescheut, eine perfekte Reise auf die Beine zu stellen.
s'Värsli isch vom Andy Kunzelmann und d'Fotos vo mir.
06.05.11 Werner Hohler Webmaster |
|
