|
Jubiläum 75 Jahre
PENSIONIERTENVEREIN DER KANTONSPOLIZEI BASEL - STADT
gegründet 1938 |
|
Mittwoch, 8. Januar 2014
Besammlung: 1250 Uhr Bahnhof SBB
Abfahrt: 1313 Uhr nach Stein-Säckingen, dann mit Bus 143 (1339h) nach Kaisten
Wanderung: Kaisten – Laufenburg, ca. 1 ¾ Std. |
|
Dr Gedanggesplìtter
Liebe ‚Peetrùs', was fiersch duu ìm Schild?
Bì ùns dehäim ìsch es schò frielìgsmìld,
wäärend me wit ewägg - z Nòòrdamèèrika -
aarggtischi Thämperatuure mässe kaa.
Bìtti schìgg is nìt - s wäär dìggi Bòscht -
dä Alasggaföön samt em iisige Fròscht,
wòn is kalt wòtt ans Gnìgg aane wääie.
Ich glaub, dènn wùùrd i glatt dùùre drääie!!
Ich schloo jètz gedangglìg wìder d Brùgg
ùnd kùmm ùff dr mìldi Wanderdaag zrùgg.
Me drìfft sìch z Baasel - ich nìmms genau -
nämmlig äinezwanzig ‚Schlùùrpi' mìt ere Frau.
|
Vòm Dräffpùnggt am Baanhoof - fascht dehäi -
goots mìt dr ‚S-Baan' am Rii noo ùff ‚Stäi'.
Dènn mìt em Bòschti - gwaasi ìm Schùss -
fääge mr ùff ‚Käischte' - es ìsch dr Gnùss.
|
Vò döört uss - es macht äim e bìtz bedròffe -
wììrd e Stügg wit ùff em Bìlgerwääg glòffe,
wò äim ìns Gedäächtnìs rieffe wètt,
ass äine vòr zwäidausig Jòòr für is glìtte hètt.
|
Bì Sùnneschiin, mìt ere sùnnige Luune,**
lauffe mr am Frììdhoof vrbii wòn i mues stuune,**
ass bì däm Ussblìgg esoo viil rueije mien
ùnd drbii käi Aug vòll gniesse dien.
Mi ìnneri Stìmm: "Ìsch di Humòòr gedììge?
Dien si en dùlde, wò döört dien lììge?"
Drùff: "Lììg zuen ene aabe, alts Khamùff!
Dènn griegsch dini Augen au nümmen ùff…"
|
Alsò, löön mr sòttigi Gedangge ìn Rue
ùnd wänden is wìder em Wandere zue.
S ‚Waldhuus', fünfhùndertvier Meeter über Mèèr,
lìggt ooben ùff dr ‚Ebni' ùnd gfallt is sèèr.
Vò döört laufe mr dènn witer dùùr e Wald,
über e schööni Strèggi ùnd seen dènn bald
mìt ere brächtige Ussìcht ùff ‚Laufebùùrg' aabe.
Döört göön mr is ìns Bäizlì ‚La Roccia' gò laabe.
|
|
|
Mr sìnn döört nò rächt lang zämme gsässe
ùnd hänn mitenander hèèrlìg gässe.
Die Wandergrùppe duet äim zämmebìnde.
Gäb se si nìt, miest me si glatt erfìnde.
**Über en anderi blötzlìg gueti Luune han i au miese stuune:
Z Rùssland, das ìsch sònderbaar,
hèèrscht zùr Zit e ‚Gläine Zaar'
ìn sinere straff gstüürte ‚Demòkratii',
wòn äär mäint, die mies esoo sii.
Alles danzt noo siinere Pfiffe,
D Mènscherächt wòtt er kuum begriffe.
Sini ‚Duuma' sòtt alles schlùgge
ùnd Juschtiz sìch fòlgsaam dùgge.
Küürzlìg lòsst äär rasch begnaadige,
grùmmi Wääg blìtzschnäll begraadige.
Rieft: "Fueget au verkachleti Fuege!
Ich wòtt, ass me wòtt koo d ‚Òlümpiaade' luege."
Andy Kunzelmann
|
Fotos:
Peter Bachmann und Werner Hohler
Homepage: Werner Hohler
10. Januar 2014 |
|