PENSIONIERTENVEREIN DER KANTONSPOLIZEI
BASEL - STADT
gegründet 1938




Wanderung Januar 2015



Mittwoch, 14. Januar 2015
Besammlung: 1300 Uhr Bahnhof SBB
Abfahrt: 1320 Uhr nach Mumpf,
dann mit Bus 90 (1347 h) nach Schupfart
Wanderung: Schupfart-Stein-Mumpf, ca. 2 Std.




Dr Gedanggesplìtter

Em ‚Peetrùs' si Verhalte han ich kuum begrìffe,
wò s schò am frieje Noomidaag hèt lò schìffe.
Dò wäär bigòscht e liichte Schneefall nätter,
als e sòne nasskiels zùùgigs Hùùdelwätter.

Dr Hìt isch, ass es e ghäizti ‚S-Baan' gìt.
Ìn dèèren ìnne räägnets jò bekanntlìg nìt.
Sìì wììrd vò Mòtòòre - soo stoots gschrììbe -
ùnd mììr vò dr Wanderlùscht aadrììbe.

Lùscht ùnd Thèchnigg sìn bäidi Drùmpf.
Ùnd dää längt is phèrfäggt ùff ‚Mùmpf'.
Döört bietet is - ganz ooni z läärme -
s Bòschti bìs ùff ‚Schùpfert' Schäärme.




Ùnsere Läiter hèt e gueti Waal dròffe,
dènn ùffeszue wììrd dùùr Rääbhäng glòffe,
mìt freiem Blìgg - nò bì liichtem Rääge -
ùff ‚Schùpfert' aabe, in dr Sänggi glääge.


Ùff em ‚Äiggerbäärg', dròtz Wanderhoose,
spüürt me dr Wèschtwìnd zùùgig bloose.
Glaar ìschs, ass mr nò zùm Ussblìgg göön:
'Schtäi-Sèggige', am Rii, lìggt hèèrlìg schöön.



Bìm Lauffe bruuchts wèder Drùmpf nò Bògg,
aaber hìlfriich ìsch dòch e Wanderstògg.
Dènn dr Wald aabe fiert is nìt faadegraad
dr dròggeni ùnd eebeni Wanderpfaad*.

Ich mäin, ich häig mini Soole hööre glaage:
"Muesch is dènn dùùr dä Pflùtter jaage?"
Es joomeret au d ‚Gòòre-Tèx'-Membraane:
"D Nèssi kùnnt schò zue de Pòòren aane!"



Z Mùmpf mäine d Wanderschue verdròsse:
"S Wätter ùff ‚Tènèriffa hänn mr gnòsse!
Mr wänn jètz ìns Rèschtòrant ‚Angger' hògge,
dènn wäärde mr ändlìg wìder drògge."

Ich wòtt mìì de Wanderschue aaschliesse
ùnd mit dr Grùppe e feins Zvieri gniesse.
Dènn goots wìder zämmen ùff Baasel zrùgg.
Ìm ‚Train bleu' gìts jò dr Abschììdsschlùgg.






*Nìt ùffem e Wander-, sòndern ùff eme döödlìge Ììrpfaad lauffe ganz gfèèrlìgi Lüt:

Die glaube - als ganz verbländeti Wääse -
si könne uss eren alte Schrìft uuse lääse,
ass me mìt Gwalt döörf Mènsche zwìnge,
ùm si ùff dr ‚Gueti Wääg' zrùgg z brìnge.

Si göön soo wit - s ìsch nit zùm Saage -
zääjèèrigi Mäitli brutaal ìn d Lùft gò jaage,
ùm esoo - sò duet me drüüber brìchte -
‚Ùnglöibigi' wìrggigsvòll z vernìchte.

Hòffentlìg diens doo käini Hètzer probiere,
drùff mìt eme Generaalverdacht z reagiere.
Soo, ass es Ùnschùldigi - i mach e Wètt -
als Mèèrhäit mìt Ussgränzig z zaale hèt.

Andy Kunzelmann

Fotos:
Peter Bachmann und Werner Hohler
Homepage: Werner Hohler
15. Januar 2015