PENSIONIERTENVEREIN DER KANTONSPOLIZEI
BASEL - STADT
gegründet 1938




Wanderung Februar 2017



Mittwoch, 8. Februar 2017
Besammlung: 1300 Uhr, Bahnhof SBB
Abfahrt: 1317 nach Liestal, mit Bus 83 nach Liestal Abzw. Hersberg
Wanderung: Liestal Abzw. Hersberg - Kaiseraugst ca. 2.Std. 30 Min.



Dr Marcel Värs

S`Wätter isch nit grad das wo i mir fyrs wandere vorgstellt ha
Temperaturmässig wo ich uff s`Trämmli warte tue hetts 5°C ka
I bi denn mit em Tram zum Bahnhof Basel SBB ko, so no di no
In dr Schalterhalle sinn scho vieli Wanderer derte zämme ko

I ha ebbe 24 Lyttli zellt vo uns und do dervo au vier Fraue
do kame ebbis unterneh und au ebbis druff baue
mit dr SBB sinn mir denn uff Lieschtel g`fahre mit verspöhtig
me hett durch das meh kenne Rede und das isch bitter nötig

In Lieschtel hänn mir dr Bus gno und sinn Verzwygig Hersberg gfahre
dert sinn denn alli vo uns uss g`stiege uss däm grosse " Karre"
wo dr Wanderleiter dr obligati Aessbstellig-Zettel verteilt hett
isch denn usse ko, dass no 2 Maa dr zue ko sinn, i mach e Wett

An dr Bushaltstell hett`s e Hüsli ka mit eme scheene Unterstand
do liegt ain vo uns am Bode, e andere suecht ebbis mit dr Hand
irgend ebbis muess do si oder isch`s ächt im Gebälk versteckt
die beide hänn nyt gfunde und do mit isch die Sach halt *abvereckt*


Vo dert isch es uffe und abe gange durch viel Wald und Wiese
zwische yne hänn mir Maitli und Fraue mit Rössli kenne begriesse
an verschiedene Ort hett`s au no Schneefläcke ka
leider au dr Lärm vo dr Autibahn e bizzeli wyter unde dra



mir sinn denn langsam aber sicher gege s`Ziel Kaiseraugst ko
d`Färnsicht isch nit guet, me hett dr Roschturm nicht s`Gsicht biko
derfyr hänn mir das Theater Augusta Raurica kenne gseh
das isch so gross und gewaltig, das ka uns niemerts me neh

In Kaiseraugscht sinn mir denn in Bahnhof Beiz go aine neh
es hett denn au unseri lang lang vorbstellte Spyse geh
do hett sich den langsam s`ainte und dr ander uff d`Sogge g`macht
isch heim zue mit Bahn, Bus oder z`Fuess bis vor *Mitternacht*





i mecht do nit unterloh dene ( 2 ) nomol dankscheen z`sage
wo mir bim Nachtässe unerlässich gläge sinn uff mim Mage
und im noch "hinein" em ehem. Wanderleiter wo nit het kenne ko
gueti Besserig z`wynsche i hoff är wird das hoffentlich verstoh
Fotos:
Peter Bachmann und Werner Hohler
Homepage: Werner Hohler
11. Februar 2017