PENSIONIERTENVEREIN DER KANTONSPOLIZEI
BASEL - STADT
gegründet 1938




Wanderung Februar 2019



Mittwoch, 13. Februar 2019
Besammlung: 1215 Uhr, Bahnhof SBB,
Abfahrt: 1237 nach Frick, Frick ab 1305 nach Benkerjoch.
Wanderung: Wanderung: Benkerjoch – Waldhaus – Gipf-Oberfrick
ca. 2Std. 30 Min.



Dr Marcel Värs

Am viertel ab zwölfi isch dr Träffpunggt in dr Schalterhalle gsi
dert stehn zirka 20 Männli und au e ainzig " Wybli" isch derbi
dr Wanderleiter hett e glaini Begriessig ka wägem e neye Ma
dä kunnt jetzt au go wandere und stoht ebbe nit naäbe dra

He nu mir sinn denn mit em Zug gege Frick uffe gfahre
do hett`s wieder dr "Frässzettel" geh, dr Ruedi will`s erfahre
in Frick hänn mir dr Bus 136 im volle Sprint miesse mache
sunsch wär dä ohni uns abgfahre, das wär denn nyt zem lache


uff em Bänkersjoch ako, s`Wätter hett sich nit loh luumpe
do hänn sich alli versammlet, au dä mit em grosse Stumpe
dr Wanderleiter hett miesse telefoniere wägem Aesse bstelle
do hett aine e kaputti Sohle ka, dä hett nimme wandere welle

vom Joch sinn mir denn durch dr Wald und teilwys au uff Schnee
vo dr Umgäbig hänn durch`s schnälle laufe e paar gar nyt gseh
bi n`ere Waldhütte hett me g`wartet und e kurzi Pause g`macht
do sinn scho wieder e paar derfo, warte das wär jo g`lacht





es hett jetzt uff aimol, nai scho wieder Gruppene geh
die hett me uff e paar hundert Meter aifach nymme gseh
in unsere Wandergruppe hett`s wo nit schnäll laufe kenne
me sott aifach e bizzli Rücksicht neh, es kenne nit alli renne

vor em Dorf vo Oberfrick hänn e paar nit g`wüsst wo`s dure goht
drum hänn sie derte miesse warte zem Glück ohni Not
do isch me denn als grosse Huffe durch`s Dorf in d`Baiz
au das muess i no erwähne, das isch dr gröschti Reiz



Mir hänn uns verpflaägt gemäss em vorbestellte Aesse
und hänn die nit ganz suuberi Wanderig fascht vergässe
im Rest. isch dä no g`sässe wo nit hett kenne mit uns wandere
und au unsere ehemoolige Wanderleiter unter viele andere


I mecht nomol in Erinnerig riefe , das mir mitenand wandere
und nit aifach laufe ohni Rücksicht uff alli andere
es wär wieder e guete Tipp vo unserem Wanderleiter Ruedi
dängget dra bim nögschte Mohl, s`kennt sie letschte si
Fotos:
Peter Bachmann und Werner Hohler
Homepage: Werner Hohler
17. Februar 2019