Dr Gedanggesplìtter
Ich lueg uuse, was seen ich - waas?
Dr Hìmmel blau, d Lùft glaar wie Glaas,
käi Biisen ùmme - wit ùnd bräit -
nüt wie loos, ich bì beräit.
Z Baasel, Träffpùnggt Schalterhalle,
döört duets mr grad nò bèsser gfalle:
Fascht drissig vò ùns ìn Wanderglùft,
wò uuse wänn an die früschi Lùft.
|
|
Ùff Lauffe hämmer d ‚Es Drei' gnoo,
mìr wänn jò nìt ‚pèr peedes' goo.
Ùff Liisbäärg ùffe - me könnt sìch gwääle -
faart men aber bèsser ìm ene ‚Gääle'.
Vò Liisbäärg goots rächt stòtzig ùffe;
me ka döört schò sini Graft verbùffe.
Dr Wanderwääg fiert is schò bald
an stòlze Bäum verbii ùff Hùggerwald.
|
|
|
E Blìgg zùm Hüügel ùff e Schneefäld aane,
duet äim an vergangene Wìnter maane.
D Schneeglöggli ùnd Groggùssli ìm Gaarte
dien mìt mìr zämme ùff e Frielìg warte.
Dr ‚Nììder-Hùggerwald-Wääg', är hòlperet;
dò hälfe zwäi Stögg, ass me nìt stòlperet.
Ooni Stögg marschiert ùnsere Wanderläiter
ùnd si Änngel ìsch e glatte Begläiter.
|
|
|
Dr Wääg fòlgt emene waldige Rand
ùnd ere Matte noo, fascht wie ne Band.
Weenig spööter - das fìnd i dìgg -
hèt men ùff ‚Röschänz' gwaasi freie Blìgg.
Dr Wald dùrab lauffe mr ‚Lauffe' zue;
zlètscht ùff dr Strooss, dò griegt me gnue
vò Diiselgstangg und Lärm im Òòr:
Für daas z gniesse, bruuchsch Humòòr!
|
|
|
Z Lauffe, do loont sìch uff jeede Fall
e Blìgg ùff d Bìrs mìt em Wasserfall.
Dènn au nò en Iikèèr ìm ‚Bischtro Lòggi',
döört griegt me gwüss nìt nùmme Schòggi.
Mr sìn drìn gmietlig zämme gsässe,
hän dr òfferierti Ùffschnìtt gässe,
Feins drungge ùnd - bì kielem Wätter -
schlùggt dr äint òder ander e ‚Kaffi Jätter'.
|
|
...und dènn nò e Gedanggesprùng:
Mi lètscht Gedangge gìlt em Wieschtesoon,
für sini Läischtig wünsch ich em e Loon:
Äär verdient e Biise mìt allen Iishäilige drzue;
die kielen em d Bììre, sò fìndet si Rue.
Andy Kunzelmann
|
Fotos:
Peter Bachmann, Andy Kunzelmann
11. März 2011 |
|
