PENSIONIERTENVEREIN DER KANTONSPOLIZEI
BASEL - STADT
gegründet 1938




Wanderung März 2019



Mittwoch, 20. März 2019
Besammlung: 1200 Uhr, Bahnhof SBB,
Abfahrt: 1217 Uhr nach Gelterkinden mit IR 27,
Bus 102 Gelterkinden ab 1240 nach Asphof,
Wanderung: Asphof nach Wittnau,
ca. 2 Std. 30 Min.



Dr Marcel Värs

Wäge dr Fasnacht hänn mir e Wuche verschiebe miesse
do hett dr Ruedi Wanderer/innen und e Hund kenne begriesse
am 12 Lochloch isch dr Träffpunggt in dr Schalterhalle SBB gsi
hoffentlich isch dä Rummel vo de viele Lyt dert inne bald verbi

i mecht no s`Wätter beschriebe und das isch sehr guet
Sunneschyn und ca. 10° C mit stiffer Bise guet fyr e Huet
mir hänn denn Bahn gno und sinn den uff Gälterkinde hinde
dert hänn mir ume gluegt ebb mir no wyteri Wanderer finde

me hett miesse vorwärts mache eso wägem Bus und so
sunsch hätte mir miesse warte wenn dä uns stoh hätti loh
mir sind denn yber Land gfahre mit däm grosse Bus
bim Asphof hett är a`halte dert uss g`stiege das isch kei Stuss

dert hett dr Wanderleiter zellt wieviel denn au sinn ko
21 Männli und 2 Wybli hänn sich diesmol nit lumpe lo
vo dert isch es nur in d`Höchi, aber zum Glück nit sehr steil
Wanderstögg brucht me, zämme setze isch ebe nit so gail






diesmol hänn sich fascht alli bim laufe dra g`halte
und Gschwindigkeit de andere a`passt und au b`halte
bi 700 m Höchi hett`s e Ussichtspunggt ka mit Bänggli
do hett me e Usszyt gno , das isch wie e Gschänggli



durch Wald wo viel Holz und Aescht vom Sturm sind umegläge
sind mir durre gloffe, em Waldbsitzer isch das sicher kai säage
das hänn mir denn bim Abstieg au kenne sage
die Träppe hänn in d`Bai und au uff e Mage g`schlage

zwische inne bim Abstieg hett`s no räschte vo nere Burg ka
e huffe hänn`s nit bemerggt und sinn verbi so näbe dra
denn hett`s e Yberraschig geh und mir sinn in Lourdes a ko
dert hett me Kerze zündet, bättet und au no aine zu sich gno


Maria Hilf hett`s denn g`haisse mir mien uff Widnau abe go
500 m Abstieg, Krüzlistich in de Bai, das muess no aine verstoh
in Widnau hett`s nur ains geh ganz schnäll in Baiz
s`Bier, dr Wy und Aesse hett g`wartet das isch dr ganzi Raiz

wo mir denn in d`Baiz ko sinn hett scho aine Sitzläder ka
es isch niemerts anders als dr Steffi, nit ebbe dr Fährimaa
noch em Aesse hänn sich alli verabschiedet und sind hei
nur aine isch derte blybe und hett ybernachtet ganz elai





Fotos:
Peter Bachmann und Werner Hohler
Homepage: Werner Hohler
22. März 2019