Jubiläum 75 Jahre
PENSIONIERTENVEREIN DER KANTONSPOLIZEI
BASEL - STADT
gegründet 1938




Wanderung Mai 2013



Mittwoch, 8. Mai 2013
Besammlung: 1115 Uhr Bahnhof SBB
Abfahrt: 1130 Uhr nach Gelterkinden, dann mit Bus (1203) nach Salhöhe
Wanderung: Salhöhe-Schafmatt-Oltingen-Wenslingen, ca. 2 Std. 15 Min.








Dr Gedanggesplìtter

Dr hüttigi Wanderdaag macht niemertem Sòòrge.
Dr Hìmmel zäigt sich glaar, vòr allem am Mòòrge.
D Thämperatuur empfìndet me frieligshaft mìld.
Dr Läiter fiert d Wanderig noo ‚Weislìge' ìm Schìld.

Die kùmmlìgi Aafaart pèr ‚ÖV' muess me loobe
zùm Aafang vòm Dìppel ùff dr ‚Salhööchi' oobe.
Em Wanderläiter drùgge - wien är muess saage -
gwüssi Büürdeli - däm söll me Rächnig draage.

Dr ‚Stèffi' hèt dènn en äifacheri Ruttewaal dròffe.
Mìt dääre sìn mr prima ùnd drzue gmietlìger glòffe.
E kalggigi Juraflue mìt Thèrassen ùnd Schnäise
lòsst mini Gedangge ùm mi Hìrnrìnde gräise…





Vòm Kalgg wänd ich mì ab ùnd dr Landschaft zue:
Die straalt ìn Frieligsfaarbe ùnd verbräitet Rue.
‚Oltige' lìggt hèèrlig bèttet am Rand vòm Daal,
ùnd si Kììrchdùùrm lüchtet glaar ìm Sùnnestraal.



Au dr Bluescht an de Kirsiböim ka me nò gniesse;
äin vò den èrschte, wò im Frielìg duet spriesse.
Dr Raps ùnd d Söiblueme blien mìt lüchtigem Gääl,
ùff saftig griene Wììse - ooni Taadel ùnd Fääl.

Bìm Wandere wäit e Lüftlì, ganz fiin ùnd lìnd.
D Wanderzit vergoot drbii ùnmèrgglìg gschwìnd.
Z ‚Weislìge' ìm ‚Dòòrfbäizlì', gìts s bstèllti Ässe -
ùnterem Zält hèt au dr Stèffi d ‚Büürdeli' vergässe.





Läider nìt überall wäit e lìnds Frieligslüftlì.
Zùm Däil stüürmts òder dr Barometer stoot mìndeschtens ùff Tieff:
Bì däm ‚Òrkaan' vergoot äim gänzlìg s Luege:
Dr ‚Noochi Òschte' fliegt glii uss de Fuege.
Er ìsch e Bùlverfass, wòs bì Stùùrm könnt verjaage.
Wieviil Òpfer muess me noochhäär beglaage?

Au zwüsche zwäi ‚Baasler Roger' fliege d Fätze.
Bäidi dängge, dr anderi kùnnt bì mìr an Lätze.
Alles wägenem Bùlver, wò äim mee als halb Lääbe
versuecht giirig z mache ùnd an äim schiint z glääbe.

Ùnspòòrtlìg wäärs ùnd drzue aanen au gspùnne
wùùrdi bhauptet, dr ‚FCZ' häig ùnverdient gwùnne.
Iigschänggt wìrd em ‚FCB' e ganz lutere Wii.
Aber muess dä Mùndschängg vò ùnd z Züüri si?

Andy Kunzelmann

Fotos:
Peter Bachmann und Werner Hohler
Homepage: Werner Hohler
10. Mai 2013