Dr Gedanggeschplitter
Vor dr Clarakirche, uff em Claraplatz,
trifft sich d Wandergrubbe ganz ohni Hatz.
By Sunneschyyn und zwei Dotzed Persoone,
duet sich dä Wanderdaag wirgglig lohne.
Me schnääderet zämme, wartet uff e Bus,
schtyggt denn yy und fahrt druff mit Gnuss
noo ‚Rümmige' hindere, ins Markgrääflerland,
voller Erwartig und wachem Verschtand.
|
|
Schoo glyy - mr hän kuum afo wandere -
zeigt sich ganz romantisch s Flüssli ‚Kandere',
umschmeichlet vom ene griene Blètterkleid -
e hèèrligs Bild, besser e-n-Augeweid!
D Sunne brääglet, 's isch düppig und heiss
und dr Wääg uff e ‚Neubärg' scho no-n-e Schteiss.
D Kolonne het sich als wie meh gschtreggt
und mìr isch fascht dr Wytwinggel vrreggt.
Bym ‚Räbhüüsli' sueche die vrschwitzte Glatte,
früschi Wösch und eebe so schnäll au dr Schatte.
Drey Grillöre dien quasi zem Cheminée renne,
drin Holz uffschichte - und scho duet das brenne!
|
Die andere - das isch eifach zem Schiesse -
höggle-n-aane und dien ìhri Grillaade gniesse.
Drzue git's kiehle Wysse, aber au roote Wyy.
Grad esoo het doch e richtigs Grillfescht z syy.
|
Dr ‚Schteffi' blybt uff Degg bis fascht zem Schluss,
erscht denn isst är syns, aber das denn mit Gnuss.
Es wird brichtet, Sprüch glopft und drzue viil glacht,
bis me sich Schtunde druff widr uff d Sogge macht.
Am Wanderwääg noo - är isch eifach e famoose -
seht me Räbschtögg, früschi Kirsi, jä sogar Roose,
Fälder, schmuggi Dörfer, wo an sanfte Hüügel dien lììge.
Griens Markgräflerland, du bisch eifach gedììge!!!
|
|
In ‚Binze', am Brunne, dien sich e paar abkiehle,
bevor si sich inne-n-aabe löön dùùreschpiehle.
D Froog isch: Wo göhn si drzue aane, nundefaane,
in nooble-n-‚Ochse' oder in dr offeni ‚Schwaane'?
D Löösig isch eifach: Si sin zem Schwaane gange,
und dört in dr Gartebeiz no rächt lang blììbe hange.
Me het sich zue-n-ere gmietlige Abschlussrunde,
bym ene Bierli odr zwei nomool zämme gfunde.
S Verhèltnis zem Absinth, ès sygi total zerrüttet,
drum heig en dr Andy, nooni lang här, vrschüttet.
Dr Edi, näbem Andy, het säll maliziös moniert
und druff s Zvieriplättli uff sy Schooss schongliert!
|
Änd vo myne Ryym, drmit kumm ich zem Schluss.
Fuul wie das Büsi, fahre mr heim zue per Bus.
In gleinere Grüppli, aber in gmietlige Runde,
het dä Wanderdaag z Basel sy Abschluss gfunde.
Andy Kunzelmann
|
Fotos:
Andy Kunzelmann
15. Juni 2010 |
|
