PENSIONIERTENVEREIN DER KANTONSPOLIZEI
BASEL - STADT


Wanderung
Oktober 2011
Mittwoch, 12. Oktober 2011 Besammlung: 1240 Uhr Bahnhof SBB
Abfahrt: 1306 Uhr nach Grellingen, , dann mit Bus 116 (1328) nach Nunningen.
Wanderung: Nunningen – Brezwil - Reigoldswil, ca. 2 Std. 30 Min.


Dr Gedanggesplìtter

Dr Wanderläiter ‚Steffi' seet sìch hütt in dr Laag
ùns z begläite bìmene dròggene Wanderdaag.
Dr ‚Heer Nääbel' fiert drbii hooch oobe Reschii,
ùnd für d Sùnne ìsch s Schiine für dää Daag vrbii.

Kùmmlìg faare mìr - das ìsch dr Waan -
ùff ‚Grällige' aane mìt dr Es-Baan,
ùnd vò döört, ùm Graft und Zit iizspaare,
wìrd ìm Pòschtauti ùff ‚Nùnnige' gfaare.

Mìr, das isch e erglèggligi Wanderschaar,
Männer ùnd au Fraue - s ìsch wùnderbaar -
wanderet ìn däm Hüügelgebiet dùrùff wie dùrab.
Bìm äinte ùnd andere wìrd d Lùft e bìtz gnabb.

Erfòlgriich duet dr ‚Heer Nääbel' aasträäbe,
e fiechti Dèggi über de Hüügel lò z schwääbe.
Drùmm wìrgge d Hèèrbschtfaarbe schääbig ùnd faad;
si verschtègge sìch gwaasi - das fìnd i schaad.

E stòlzes Gschöpf wiene ‚Brätzbeler Kue',
lùegt e bìtz glangwiilt im Fòtigraaf zue
ùnd dänggt: "Due s Abdrùgge nìt vrgässe,
ass ich ändlige kaa witerfrässe."

S büürlige ‚Brätzbel' lìggt schmùgg im Daal,
nùmme si Schuelhuus ìsch zùm Aaluegen e Gwaal.
D Behöörde hän òffesìchtìg dä Architèggt gschètzt,
drzue nò dä Buur, wò vòrnedraa Kìrsibäum sètzt.

Joo, es ìsch äigentlìg e bìtzeli gspùnne:
Mr fìnde z ‚Reigoldswil' dòch nò d Sùnne:
Üsserlig ìn Fòrm vònere schmùgge Bäiz,
dòch dr Spiiskaarte dìnne fäält dr gwüss Räiz.

E Schììrm hèt me hütte nie bruucht
ùnd Hìtz òder Kèlti hän au niemer gschluucht.
Ich hòff, es giengi au s näggscht Mòll so witer,
dènn fròschtigi Zite, die find ich schiter!



Mi Gedangge zum Schlùss ìn Sache Schììrm:

Ìn dr Slòwakei, z Öiroopa wit ìm Òschten ääne,
duet me dr ‚Öirò-Rèttigsschììrm' ablääne.
Mìt ììm wùrd me - das sig dènn käi Gschbass -
bì dère Finanzlaag genau gliich pflòtschnass.

Andy Kunzelmann

Fotos:
Peter Bachmann und Werner Hohler
Homepage Werner Hohler
13. Oktober 2011