PENSIONIERTENVEREIN DER KANTONSPOLIZEI
BASEL - STADT


Wanderung
November 2011
Mittwoch, 09. November 2011 Besammlung: 1315 Uhr BLT-Haltestelle FLÜH
Abfahrt: 1330 Uhr mit Bus 69 Richtung Mariastein bis Haltestelle "Rotberg"
Wanderung: Bus Haltestelle – Rotberg – Metzerlen - Niderholz – Heulen – Flüh, ca. 2 Std.


Dr Gedanggesplìtter

Dräffphùnggt hütt nìt Baanhof, sòndern ‚Flie',
mìt em Drämmli ùnd dr BLT macht das käi Mie.
Drzue ìsch es schöön sùnnig, nìt nùmme häiter.
E Gnùssdaag für d Wandergrùppe mìt ììrem Läiter.

Ìm Pòschtauti zùr ‚Bùùrg Rootbäärg' ìsch au käi Liide.
Bì dr Haltstèll ìn ììrer Nööchi stoot e Druurwiide;
si zäigt sìch ìm e hèèrbschtlìge, gòldgääle Gläid;
ass die Bracht glii verbii ìsch, das duet äim schò läid.

D ‚Bùùrg Rootbäärg' hèt e langi ùnd ìntresanti Gschìcht,
die sprängt aber dr Raame vò däm gläine Gedìcht.
Ass si soo doostoot, ìsch au s Wärgg vò Jùnge,
ùnd ìsch als ‚Jùùgi' ganz bsùnders guet glùnge.

D Wanderig fiert is an pflägte Òbschtböim verbii.
Ììri spoothèèrbschtìgi Faarbebracht faart jeedem ii.
E Blìgg ùffs büürlìge ‚Mètzerle' duet sìch au loone;
wie viil Buure dien ächtsch ìm Buuredòrf woone?

Dùùre Buurehoof ‚Höile' duet d Landesgränze verlaufe.
Wò zaalt me d Stüüre, wènn me dä Hoof duet verkaufe?
Dr Rìtter vò dr Landskroon hèts gwüsst, aaber vergässe,
wòner em ‚Nòldi Schìgg' si stäinigi Roose hèt gfrässe.

Wit ewägg vòm ‚Glooschter Mariastäi' stöön Rääbe
ìn Goldgääl Sbalier; Schööners suecht me vergääbe.
S Glooschter wie dr Räbbäärg - me kaas zämmefasse -
dien pherfèggt zùm gsùnden Augemaass basse.

Bald drùff seet men ùnseri Grùppe uss èltere ‚Gnaabe'
mìt Ziil ‚Rèschtòrant Stäärnebäärg' ùff ‚Flie' aabe draabe.
Me ìsst öbbis ùnd duet drzue äins òder zwäi stämme,
gsbrööchlet ùnd hòggt ooni z überbòòrde nò zämme.



None Gedangge zùm Schlùss wägem Überbòòrde:

Schlìmmi Eräignis rùnd ùmmen Ärdball diens zäige:
dr mènschlìgi Faggtòr ìschs, wò zem Überbòòrde duet näige.
D Fòlge druss ùnd d Natuur wäärden is zrùggbìnde,
bìs mr wìder s gsùnden Augemaass dien fìnde.

Andy Kunzelmann

Fotos:
Peter Bachmann und Werner Hohler
Homepage Werner Hohler
10. November 2011
Uebrigens, betreffend Sonnenschein:


Wylerrank bei unserer Wanderung und genau 24 Stunden später