Monatswanderung vom Dezember 2009 |
 |
Dezemberwanderung
bei Sonnenschein:
Mittwoch, 9. Dezember 2009
Besammlung: 1330 Uhr Allschwil Endstation Tramlinie 6
Abfahrt: 1354 Uhr mit Bus 33 nach Schönenbuch
Wanderung: Schönenbuch-(via Aperitif) nach Allschwil zum Jahresabschluss
ab 1730 Uhr im Rest. Schützengarten in Allschwil
|
|
|
|
|
|
|
Dr Gedanggeschplitter
Verbyy ruscht d Zyt – joo, s’isch wòòr,
verbyy au scho wider e Wanderjòòr.
D Wandergrubbe, wie immer ‚im Schuss’,
schtiggt genau e soo in dr Liniebus.
Dä fiehrt is diräggt noo Schöönebuech,
und s Guet isch, es schtöört is dört kei Ruech.
Dr Himmel zeigt sich sunnig und heiter,
ganz im Sinn vom ‚Schteffi’ Wanderleiter.
Au als Wanderfründ duet sich entpubbe –
dr Petrus – är verschoont die Wandergrubbe
vo Rääge, Alasggaföön, wie au vo dr Gribbe –
pufft drbyy em Saugribbe-Deufel in d Ribbe.
Gmietlig uff dr Route, doch rächt bald,
wandere mir dùùr e-n-Allschwilerwald.
Uff halbem Wääg – ich find das gfèllig –
wird au scho dr aamächeligi Apéro fèllig.
Me wott sich jo schliesslig nit loo hetze.
Nei, in sich goo und s Nachtässe schètze.
Bis zue däm Zytpunggt – das isch e-n-andere –
gilt’s no wyters noo Allschwil z wandere.
Är isch’s gsìì, dä gmietligi Adväntszyt-Bummel
dr beschti Ussglyych zue däm Wiehnachtsrummel.
Und me kaa – wenigschtens empfind ich’s e soo –
die eigeni Seel drbyy so heerlig baumele loo.
Jetz grad sitze mir zämme in gmietliger Runde
z Allschwil, und löön is glyy s Dessert lo munde.
Zeige mir is doch danggbar – es goht is soo guet –
wäm nit, wünsche mir Gsundheit und Lääbesmuet.
Andy Kunzelmann
|
|
|
Fotos:
Peter Bachmann Werner Hohler
10. Dezember 2009 |
|
