PENSIONIERTENVEREIN DER KANTONSPOLIZEI
BASEL - STADT


Wanderung

12.12.12
Mittwoch, 12. Dezember 2012
Besammlung: 0940 Uhr, Oberwil Dorf, Vorplatz Coop
Abfahrt: 0959 Uhr mit Bus 60 nach Biel Benken (Hst. Brücke)
Wanderung: Benken Brücke-Bielhübel-Weierhof-Binningen, 1 ¾ Std
Mittagessen: Ab 1200 Uhr, Rest. Spiegelfeld, Binningen (Hallenbad) Menue: Kürbiscrèmesuppe, gem.Salat, Schweinesteak mit Pilzen, Spätzli, Soufflé-Clace „Grand Marnier“



Dr Gedanggesplìtter zùm Advänt
(vòòrdräit ìm Rèschtòrant ‚Spiegelfäld')

Lang bevòòr die èrschti Uur hèt tìggt,
sìnn drei Wäisi dùùr d Wieschti grìtte,
ùm bìm Jesùskìnd, wò ìnere Grìppe lìggt -
z Beetlèheem - für si Bèschts z bìtte.

Die drei Wäise möchte nò sò gäärn
däm Kindli gò Gschänggli überräiche.
Dr Wääg wiist ììne e bsùndere Stäärn,
wò ììne hìlft, s gstèggti Ziil z erräiche.

Die drei Köönig hänn au inwèschtiert -
vòr allem viil Zit statt nùmme Gäld -
esoo hänn sìì si doozmòll guet brèschtiert,
die strängi Räis dùr e haarti Wält.

Ganz wìchtig wääri ìm Advänt, ich dängg,
Zit für d Bsìnnig, statt de Sènsazioone.
Dr Èrfòlg drvoo, als vòòrnääms Gschängg,
wùrdi sìch bsùnders für d Gsündi loone.

Hütt macht me nò an de Sùnntige ùff.
Soo vergrootet dr Wienachtsmäärt-Bùmmel -
sètzt me nò mee sò Ùmdrììb drùff -
zùm ene gwöönlìge Stadtmäärt-Rùmmel.
Mìr Woolstandslüt, wòs Lääbe gniesse,
nie gnueg hänn ùnd nach nò mee strääbe,
dien bìm Gniesse öppen übers Ziil us schiesse.
Millioone strääbe nò däm lääbeslang vergääbe.

Usem Mòòrgeland kömme Hüffe vò miise Brìcht;
doo macht me sìch Sòòrge wägem ‚vòlle Boot'.
Bedängglìg schiint mr die ùffgwèrmti Gschìcht
ùnd d Angscht, mìr groote wäge däm ìn Noot.

Sòtt me ab däm Zitgäischt nìt verschrègge?
Nümm - Idealìschte ka me höören ùnd see:
Si musiziere, sìnge an de zùùgigschten Ègge
ùnd sammle - das ìsch ùnseri Häilsarmee.

Mìt däm Biitraag möcht ich glii schliesse,
wünsch Öich allne witers e glatte Daag.
Diend s feini Dèsseer nò ussgììbig gniesse
ùnd glatschet em ‚Stèffi', ass er witer läite maag.

Alle wünsch ich e frììdlìgs Wienachtsfèscht,
drzue en aagnääme Rùtsch ìns nöie Jòòr,
fürs s ganz näggschti Jòòr nùmme s Bèscht
ùnd für schlächteri Zite e gsùnde Humòòr.

Andy Kunzelmann

Fotos:
Peter Bachmann und Werner Hohler
Homepage Werner Hohler
12. Dezember 2012