PENSIONIERTENVEREIN DER KANTONSPOLIZEI
BASEL - STADT
gegründet 1938




Wanderung Dezember 2018



Besammlung: Mittwoch, 12.12.18, 1400 Uhr beim Fischmarktbrunnen
Wir machen einen Rundgang durch die Innerstadt mit professioneller Führung.



Dr Marcel Värs

dr Johres-Abschluss 2018 hett`s in sich ka
bim Fischmärktbrunne hett sich troffe Frau und Ma
am 14 LochLoch isch denn dert dr Träffpunggt gsi
me glaubt`s fascht nit aber ebbe 40 Persone sinn derbi

dert hett dr Wanderleiter ebbis zem schrybe umme geh
willsch e Apero, willsch ebbis ässe oder vo dr Stadt g`seh
me hett e Kryzli miesse mache was me alles will ha
die wo nit hänn welle hänn kenne uff Schiff vom Fährima


dert uff em Platz vom Fischmarkt stoht aine unter uns do
är hett e Stoffmantel a wo uss em letschte Johrhundert isch ko
es isch dr Grabmacherjoggi wo uns d`Altstadt zeige duet
är stoht dert mit emene Stogg und Bart und au no Huet





mit sym *kaputte Schaiche* nimmt är uns uffe Rundgang
Träppe uffe und au abe durch Gässli und au e Durchgang
är duet au mit e huffe Sprych vo de alte Zyte verzelle
viel wissenswärtes vo friehner, är hett nümme höhre welle

bim Andreasplatz isch denn Aendstation vom Bummel gsi
dert hänn mir im Joggi danggt denn dr Rundgang isch verbi
vo dert sinn mir denn nomol zuem Nodlebärg uffe
im Käller vo de Stainlemer hänn mir uns kenne *verpuffe*



nooch dere Kälti dusse isch s`denn warm gsi do
dr Peter hett sich d`mieh gno und hett uns g`stiftet dr Apero
nooch em Apero hett me sich verabschiedet vo do
und isch mit Bus und z`Fuess an unseri Kantonsgränze ko


im Lange Loh hänn mir uns alli wieder im Restaurant troffe
i glaub jo nit dass dert eine z`Fuess isch ane gloffe
im Bohrerhof hett`s z`Nachtässe und au ebbis z`dringge geh
es isch guet gsi me hett gnue ka was will me denn no meh

am Obe hett dr Wanderleiter an die stille Macher ebbis geh
und hett sich bedanggt derfyr im Johr 19 die wieder g`seh
i wynsch allne scheeni Feschtdäg und e guets neys Johr
beschte Dangg an alli Macher und bis am 9. Jänner s`isch wohr

Fotos: Peter Bachmann
Homepage: Werner Hohler
15. Dezember 2018